ផ្នែកបង្កើតមាតិកាមានតូនាទីក្នុងការផលិត និងចែករំលែកមាតិកាបច្ចេកទេស និងឌីជីថល។ ត្រូវមានភារកិច្ចបង្កើតមាតិកា ដូចជា ផលិតវីដេអូ រៀបចំស្គ្រីប អត្ថបទ និងមាតិកាឌីជីថលផ្សេងៗ ព្រមទាំងកែសម្រួល និងរចនាមាតិកាឲ្យមានភាពទាក់ទាញ។ ការងារនេះត្រូវការសហការជាមួយក្រុមបច្ចេកទេស ទីផ្សារ និងតាមដានវាយតម្លៃប្រសិទ្ធភាពមាតិកា។ បេក្ខជនត្រូវមានបរិញ្ញាប័ត្រ ផ្នែកទំនាក់ទំនង ឬទីផ្សារ អាចប្រើប្រាស់ និងសរសេរភាសាអង់គ្លេសបានល្អ មានជំនាញក្នុងការបង្កើតមាតិកា និងប្រើប្រាស់បណ្តាញសង្គម ព្រមទាំងមានគំនិតច្នៃប្រឌិត និងទំនួលខុសត្រូវ។

ផ្នែករចនាក្រាហ្វិកដើម្បីរចនា និងអភិវឌ្ឍសម្ភារៈផ្សព្វផ្សាយឌីជីថល។ អាចរចនា Banner, Poster និងមាតិកាសម្រាប់បណ្តាញសង្គម បង្កើតរូបភាពទាក់ទាញ និងជួយកែសម្រួលរូបភាព ឬវីដេអូកម្រិតមូលដ្ឋាន។ បេក្ខជនត្រូវមានបរិញ្ញាបត្រផ្នែកពាក់ព័ន្ធ ចេះប្រើ Illustrator, Photoshop, Canva យល់ដឹងអំពី Social Media និងមានគំនិតច្នៃប្រឌិតជាមួយទំនួលខុសត្រូវ។

ផ្នែកវិទ្យាសាស្រ្ដទិន្នន័យត្រូវទទួលបន្ទុកលើការប្រមូល និងបកស្រាយទិន្នន័យធំៗ ដើម្បីទាញយកព័ត៌មានសំខាន់ៗ រៀបចំបង្កើត Dashboard សម្រាប់គាំទ្រដល់ការសម្រេចចិត្ត សហការការងារយ៉ាងជិតស្និទ្ធជាមួយក្រុមការងារពាក់ព័ន្ធ និងធានាឱ្យបាននូវសុវត្ថិភាព ព្រមទាំងភាពត្រឹមត្រូវនៃទិន្នន័យតាមស្តង់ដារកំណត់។

អ្នកជំនាញព័ត៌មានវិទ្យាជាន់ខ្ពស់ មានតួនាទីសំខាន់ក្នុងការគ្រប់គ្រង ប្រតិបត្តិការ និងអភិវឌ្ឍប្រព័ន្ធព័ត៌មានវិទ្យា ដើម្បីគាំទ្រដល់ការងាររបស់អង្គភាពឱ្យមានប្រសិទ្ធភាព និងសុវត្ថិភាព។ តួនាទីនេះរួមមានការរៀបចំ និងអនុវត្តគោលនយោបាយ IT ការគ្រប់គ្រងប្រព័ន្ធម៉ាស៊ីនមេ និងបណ្តាញ ការថែទាំផ្នែករឹង និងផ្នែកទន់ ក៏ដូចជាការធានាសន្តិសុខទិន្នន័យ និងប្រព័ន្ធ។ បន្ថែមពីនេះ បុគ្គលិកត្រូវផ្តល់ការបណ្តុះបណ្តាលដល់អ្នកប្រើប្រាស់ ដោះស្រាយបញ្ហាបច្ចេកទេស និងចូលរួមក្នុងការកែលម្អប្រព័ន្ធឱ្យទាន់សម័យ។ តួនាទីនេះទាមទារជំនាញបច្ចេកទេសខ្ពស់ សមត្ថភាពវិភាគ និងការដោះស្រាយបញ្ហា ព្រមទាំងការសហការជាក្រុម និងការទំនាក់ទំនងបានល្អ។

មន្ត្រីផ្នែកបច្ចេកទេស មន្ទីរពិសោធន៍មេកានិច អគ្គិសនី និងអេឡិចត្រូនិច មានតួនាទីសំខាន់ក្នុងការធ្វើតេស្ត វាយតម្លៃ និងធានាគុណភាពឧបករណ៍ និងប្រព័ន្ធបច្ចេកទេសផ្សេងៗ។ តួនាទីនេះពាក់ព័ន្ធនឹងការតម្លើង ប្រមូលផ្ដុំ និងត្រួតពិនិត្យប្រព័ន្ធមេកានិច អគ្គិសនី និងសៀគ្វីអេឡិចត្រូនិក ដើម្បីធានាបាននូវប្រសិទ្ធភាព និងសុវត្ថិភាពក្នុងការប្រើប្រាស់។ បន្ថែមពីនេះ បុគ្គលិកត្រូវអនុវត្តការប្រើប្រាស់ និងថែទាំឧបករណ៍មន្ទីរពិសោធន៍ ដោះស្រាយបញ្ហាបច្ចេកទេស និងវិភាគទិន្នន័យ ដើម្បីរៀបចំរបាយការណ៍បច្ចេកទេសបានត្រឹមត្រូវ។ ក៏ដូចជាចូលរួមក្នុងការអភិវឌ្ឍផលិតផល ការគ្រប់គ្រងគុណភាព និងការរៀបចំឯកសារបច្ចេកទេស។ តួនាទីនេះទាមទារជំនាញបច្ចេកទេសល្អ ការយកចិត្តទុកដាក់ខ្ពស់ ការទទួលខុសត្រូវ និងសមត្ថភាពធ្វើការជាក្រុម និងដោយឯករាជ្យ ខណៈពេលអនុវត្តតាមបទដ្ឋានសុវត្ថិភាពយ៉ាងម៉ឺងម៉ាត់។

មន្ត្រីផ្នែកបច្ចេកទេស មន្ទីរពិសោធន៍គីមីសាស្រ្ត មានតួនាទីអនុវត្តតេស្តវិភាគគីមីលើសំណាកផ្សេងៗ ដូចជា ទឹក ម្ហូបអាហារ និងផលិតផលមិនមែនម្ហូបអាហារ ស្របតាមស្តង់ដារអន្តរជាតិ ISO/IEC 17025។ តួនាទីនេះរួមមានការគ្រប់គ្រងសារធាតុគីមី ឧបករណ៍ និងសម្ភារពិសោធន៍ ការរៀបចំឯកសារបច្ចេកទេស ក៏ដូចជាការអភិវឌ្ឍន៍វិធីសាស្រ្តវិភាគឱ្យទាន់សម័យ។ បុគ្គលិកត្រូវមានជំនាញបច្ចេកទេសខ្ពស់ ការយកចិត្តទុកដាក់ និងអនុវត្តតាមបទដ្ឋានសុវត្ថិភាព និងគុណភាពយ៉ាងម៉ឺងម៉ាត់។